విశాలాంధ్ర-రాప్తాడు (అనంతపురం జిల్లా) : వివిధ గ్రామాల్లో ఉన్న మసీదుల ప్రాంగణంలో ముస్లిం సోదరులు త్యాగానికి ప్రతీక అయిన బక్రీద్ (ఈద్-అజ్హా) పండుగను అత్యంత భక్తిశ్రద్ధలతో, ఘనంగా నిర్వహించారు. పండుగను పురస్కరించుకుని ముస్లిం నివాసాలు, ప్రధాన మసీదుల ప్రాంగణాలు భక్తులతో మరియు ఆధ్యాత్మిక శోభతో కళకళలాడాయి. ఈ సందర్భంగా మసీదుల ప్రాంగణంలో ప్రత్యేక ప్రార్థనల సమావేశాలు ఏర్పాటు చేయగా, మసీదు ఆవరణలోని ప్రశాంత వాతావరణంలో ప్రార్థనా స్థలంలో ముస్లిం పెద్దలు, యువకులు చాపలపై క్రమశిక్షణతో మౌనదీక్ష నిర్వహించి బక్రీద్ ప్రవచనాన్ని ఎంతో నిమగ్నమై ఆలకించారు. ఈ సందర్భంగా మౌలానా భక్తులను ఉద్దేశించి ప్రసంగిస్తూ, బక్రీద్ పండుగ యొక్క విశిష్టతను మరియు మత ప్రాముఖ్యతను వివరించారు. ప్రవక్త హజ్రత్ ఇబ్రహీం చూపిన అపారమైన దైవభక్తి, త్యాగ నిరతిని ప్రతి ఒక్కరూ తమ జీవితంలో ఆదర్శంగా చూపిస్తున్నారు. సమాజంలో శాంతి, కరుణ, సోదరభావం పెంపొందించుకోవాలని, ఉన్నదానిలో పేదలకు సహాయం చేయడమే ఈ పండుగ యొక్క అసలైన అంతరార్థమని మౌలానా గుర్తుచేశారు. మసీదుల ప్రాంగణంలో ప్రత్యేక నమాజ్ మరియు మౌలానా ప్రవచనం పూర్తి అయిన తరువాత ముస్లిం సోదరులు ఒకరికొకరు “ఈద్ ముబారక్” అంటూ ఆలింగనం చేసుకుని పండుగ శుభాకాంక్షలు తెలుపుకున్నారు. అనంతరం బక్రీద్ సాంప్రదాయం ప్రకారం ఖుర్బానీ (త్యాగం) ఇచ్చి, ఆ ప్రసాదాన్ని బంధుమిత్రులకు, ముఖ్యంగా పేద సాదలకు పంపిణీ చేస్తూ తమ ఉదారతను చాటుకున్నారు. మండల వ్యాప్తంగా బక్రీద్ వేడుకలు అత్యంత ప్రశాంతమైన, సంతోషకరమైన వాతావరణంలో ముగిశాయి.
పోస్ట్ భక్తిశ్రద్ధలతో బక్రీద్ వేడుకలు మొదట కనిపించింది విశాలాంధ్ర.
