హైదరాబాద్ : నగరంలో ట్రాఫిక్ సమస్యలకు శాశ్వత పరిష్కారం చూపడంతో పాటు భవిష్యత్ అవసరాలకు అనుగుణంగా హైదరాబాద్ సిటీ ఇన్నోవేటివ్ ట్రాన్స్ఫర్మేటివ్ ఇన్ఫ్రాస్ట్రక్చర్ (హెచ్-సిటీ) ప్రాజెక్టు పనులు వేగవంతం అయ్యాయి. డిజైన్38 ప్రాంతాల వంతెనలు, అండర్పాస్లు, రోడ్ల విస్తరణ చేపట్టేందుకు రూ.7,162 కోట్ల అంచనా వ్యయంతో ప్రతిపాదనలు సిద్ధం చేశారు. తొలి దశలో రూ.5,942 కోట్ల పనులు చేపట్టాలని నిర్ణయించిన అధికారులు, మెజారిటీ ప్రాజెక్టులకు టెండర్ ప్రక్రియ పూర్తి చేసి నిర్మాణాలు చేపట్టారు. వ్యూహాత్మక అభివృద్ధి కార్యక్రమం (ఎస్ఆర్డీపీ) కింద గతంలో చేపట్టిన పలు ప్రాజెక్టులు కూడా త్వరలో ప్రజలకు అందుబాటులోకి రానున్నాయి.
తక్కువ ఆస్తుల సేకరణ ఉన్న చోటే ముందుగా పనులు
హెచ్-సిటీ ప్రాజెక్టుల అమల్లో ప్రభుత్వం వ్యూహాత్మకంగా ముందుకెళ్తోంది. తక్కువ ఆస్తుల సేకరణ అవసరమయ్యే ప్రాంతాల్లో ముందుగా నిర్మాణాలు చేపట్టాలని అధికారులకు సూచించింది. అదే సమయంలో మిగిలిన ప్రాంతాల భూసేకరణ, ఆస్తుల సేకరణపై ప్రత్యేక దృష్టి పెట్టింది. అభివృద్ధి బదలాయింపు హక్కులు (టీడీఆర్) ఇచ్చేందుకు యజమానులతో చర్చలు కొనసాగుతున్నాయి. టీడీపీకి అంగీకరించని వారికి పరిహారం చెల్లించే అవకాశం ఉంది.
అగ్రసేన్ జంక్షన్ వద్ద పనులు వేగంగా
కేబీఆర్ పార్కు పరిసర జంక్షన్ల అభివృద్ధికి రూ.1,060 కోట్లతో వంతెనలు, అండర్పాస్లు నిర్మించనున్నారు. మహరాజ్ అగ్రసేన్ జంక్షన్ చౌరస్తాలో రూ.144 కోట్లతో 590 మీటర్ల వంతెన, 410 మీటర్ల అండర్పాస్ కట్టారు. ఐదు నుంచి 15 అడుగుల వెడల్పు ఉన్న సెంట్రల్ మీడియన్లో తవ్వకాలు ఉన్నాయి. ఫిల్మ్నగర్ వైపు నుంచి బసవతారకం ఆసుపత్రి వైపు వెళ్లేలా రెండు లెన్ల అండర్పాస్ నిర్మాణం జోరుగా సాగుతోంది. ఈ అండర్పాస్ పూర్తయ్యాక ఫిల్మ్నగర్ నుంచి బంజారాహిల్స్ రోడ్ నంబర్-5, 12 వెళ్లే వంతెన పనులు చేపట్టారు అధికారులు.
ముగ్ధ జంక్షన్లో వంతెన, రెండు అండర్పాస్లు
కేబీఆర్ పార్కు ప్రధాన ప్రవేశద్వారం సమీపంలోని ముగ్ధ జంక్షన్ వద్ద రూ.250 కోట్లతో వంతెన, రెండు అండర్పాస్ల నిర్మాణం నిర్మాణం. పంజాగుట్ట నుంచి వచ్చే వాహనాలు జూబ్లీ చెక్పోస్ట్ వైపు వెళ్లేందుకు పార్కు ప్రవేశద్వారం చౌరస్తాలో సుమారు 600 మీటర్ల పొడవునా నాలుగు లెన్ల వంతెన నిర్మించారు. ఎల్వీ ప్రసాద్ ఆసుపత్రి ఎదుట కూడా పనులు కొనసాగుతున్నాయి. ఇప్పటివరకు 16 పిల్లల రాఫ్ట్ ఫౌండేషన్ కాంక్రీట్ పనులు పూర్తయ్యాయని ఇంజినీరింగ్ విభాగం అధికారులు తెలిపారు.
ఇక ముగ్ధ జంక్షన్ వద్ద 200 మీటర్ల పొడవున రెండు లెన్ల అండర్పాస్ నిర్మించారు. జూబ్లీ చెక్పోస్ట్ నుంచి బసవతారకం క్యాన్సర్ ఆసుపత్రి చౌరస్తా వైపు వెళ్లేలా 330 మీటర్ల పొడవున మరో రెండు లెన్ల అండర్పాస్ నిర్మించనున్నారు.
ఎస్ఆర్డీపీ పనులు తుది దశలో
ఎస్ఆర్డీపీ కింద గతంలో ప్రారంభించిన నల్గొండ క్రాస్రోడ్ స్టీల్ బ్రిడ్జి, మూసీ నదిపై ముసారాంబాగ్ వద్ద పనులు తుది దశకు చేరుకున్నాయి. వీటిని ఈ నెలలోనే ప్రారంభించాలనే లక్ష్యంతో అధికారులు ఏర్పాట్లు చేస్తున్నారు.
