పాకిస్తాన్ సినిమా: ఒకప్పుడు లోకల్ కే పరిమితమైన పాకిస్తానీ సినీ రంగం ఇప్పుడు ప్రపంచ మార్కెట్పై దృష్టి పెట్టింది. డిజిటల్ స్ట్రీమింగ్లో ప్రాంతీయ కంటెంట్కు పెరుగుతున్న ఆదరణను అవకాశంగా మార్చుకోవాలని కోరుకుంటున్న పాకిస్తాన్ ప్రభుత్వం, తమ సినిమాలు, టెలివిజన్ ధారావాహికలను ప్రపంచవ్యాప్తంగా ఉన్న ప్రేక్షకులకు మరింతగా చేరడానికి కీలక అడుగులు వేస్తున్నాయి. ఈ ప్రపంచ ప్రఖ్యాత స్ట్రీమింగ్ సంస్థ నెట్ఫ్లిక్స్ ప్లాట్ఫామ్తో చర్చలు జరుగుతున్నాయని అధికారికంగా వెల్లడించడం ఆసక్తిగా మారింది.
పాకిస్తాన్ ప్రణాళిక అభివృద్ధి కార్యక్రమాల శాఖ మంత్రి అహ్సాన్ ఇక్బాల్ ఈ అధికారికంగా ప్రకటించారు. ఎక్స్లో చేసిన పోస్టులో ఆయన పాకిస్తానీ సినిమాలు, డ్రామాలను సాటిలేనివిగా అభివర్ణించారు. దక్షిణాసియా దేశాలతో పాటు గల్ఫ్ దేశాలు, ప్రపంచవ్యాప్తంగా ఉన్న పాకిస్తానీ ప్రవాసుల మధ్య తమ దేశ కంటెంట్కు పెరుగుతున్న ఆదరణను ప్రస్తావిస్తూ, “ఉరాన్ పాకిస్తాన్” కార్యక్రమంలో భాగంగా వినోద రంగాన్ని కీలకంగా రూపొందించాలని ప్రభుత్వం భావిస్తున్నట్లు ప్రకటించింది.
ప్రస్తుతం నెట్ఫ్లిక్స్, అమెజాన్ ప్రైమ్ వీడియో వంటి అంతర్జాతీయ ఓటీటీ వేదికలు ప్రపంచవ్యాప్తంగా కోట్లాది మంది ప్రేక్షకులను చేరుకునే మార్గాలు ఉన్నాయి, అయితే ప్రాంతీయ రాజకీయ పరిస్థితులు, మార్కెట్ పరిమితులు వంటి కారణాల వల్ల పాకిస్తానీ కంటెంట్కు తగిన అవకాశాలు లభించడం లేదని ప్రభుత్వం అభిప్రాయపడింది. ఈ పరిస్థితిని మార్చేందుకు ఓటీటీ వేదికలతో చర్చలు జరుపుతున్నామని, ప్రపంచ స్ట్రీమింగ్ మార్కెట్లో పాకిస్థాన్ కూడా సముచితమైన స్థానం సంపాదించాలని ప్రభుత్వం లక్ష్యంగా పెట్టుకుందని చెప్పారు.
ఇంతటితో ఆగకుండా, పాకిస్తాన్ తన సొంత ఓటీ ప్లాట్ఫామ్ను కూడా అభివృద్ధి చేసే పనిలో ఉంది. ఈ స్వదేశీ స్ట్రీమింగ్ ద్వారా దేశీయ ప్రేక్షకులతో పాటు విదేశాల్లోని పాకిస్తానీ ప్రవాసులకు స్థానిక సినిమాలు, డ్రామాలు, ఒరిజినల్ వెబ్ కంటెంట్ను ఒకే వేదికపై అందించాలని ప్రభుత్వం భావిస్తోంది. అయితే ఈ ప్లాట్ఫామ్ ఎప్పుడు రూపొందించబడింది, దాని నిర్వహణ ఎలా ఉంటుంది, ఎంత బడ్జెట్ కేటాయించబడుతుంది వంటి వాటి గురించి ఇప్పటివరకు ఎలాంటి అధికారిక వివరాలు వెల్లడించలేదు.
అలాగే నెట్ఫ్లిక్స్తో జరుగుతున్న చర్చలు ఏ దశలో ఉన్నాయనే విషయాన్ని కూడా ప్రభుత్వం స్పష్టం చేయలేదు. మరోవైపు నెట్ఫ్లిక్స్ సంస్థ కూడా పాకిస్తాన్ ప్రభుత్వంతో ఎలాంటి భాగస్వామ్య ఒప్పందం కుదిరిందని ఇప్పటివరకు అధికారికంగా ప్రకటించలేదు. గతంలో కొన్ని పాకిస్తానీ డ్రామాలు లైసెన్సింగ్ ఒప్పందాల ద్వారా నెట్ఫ్లిక్స్లో ప్రసారమైనప్పటికీ, ఆ దేశానికి చెందిన ఒరిజినల్ ప్రొడక్షన్లకు పెద్దగా అవకాశాలు లభించలేదు. అయితే ప్రస్తుతం జరుగుతున్న ఈ ప్రయత్నాలు విజయవంతమైతే పరిస్థితి మారే అవకాశం ఉంది. అంతర్జాతీయ ఓటీ మార్కెట్లో పాకిస్తానీ కథలకు గుర్తింపు వచ్చే అవకాశం ఉంది.
