తెలంగాణ ప్రభుత్వం ఇందిరమ్మ పట్టణ గృహ నిర్మాణ పథకాన్ని ఆమోదించింది: తెలంగాణ ప్రభుత్వం పట్టణ ప్రాంత పేదలు, అల్పాదాయ వర్గాల సొంతింటి కల సాకారం చేసే దిశగా అడుగులు వేస్తూ ‘ఇందిరమ్మ పట్టణ గృహ నిర్మాణ’ పథకానికి సంబంధించి కీలక ఉత్తర్వులు జారీ చేసింది. ఆర్థికంగా వెనుకబడిన (EWS), అల్పాదాయ (LIG) వర్గాలకు 2-BHK (రెండు పడక గదులు) తరహాలో సరసమైన ధరల్లో నాణ్యమైన ఇళ్లను నిర్మించేందుకు ఈ ప్రత్యేక నిబంధనలను ప్రభుత్వం ఆమోదించింది. తెలంగాణ హౌసింగ్ బోర్డు (TGHB) ద్వారా ఈ సరసమైన పట్టణ గృహాల నిర్మాణం చేపట్టనున్నారు. ఈ ప్రాజెక్టుకు సంబంధించిన పరిపాలనా ప్రక్రియలను మరింత సులభతరం చేస్తూ గృహాల అనుమతుల్లో జాప్యానికి చెక్ పెట్టేందుకు ప్రభుత్వం ప్రత్యేక చర్యలు చేపట్టింది.
ఇందులో భాగంగా అనుమతుల ప్రక్రియను వేగవంతం చేయడానికి ఒక ప్రత్యేక ‘సింగిల్ విండో కమిటీ’ (TGHB అఫర్డబుల్ అర్బన్ హౌసింగ్ సింగిల్ విండో కమిటీ) ని ఏర్పాటు చేసింది. ఈ విధానం ద్వారా అనుమతుల జాప్యం లేకుండా వేగవంతమైన సేవలు అందనున్నాయి. అలాగే నిర్మాణాలను త్వరితగతిన పూర్తి చేయడానికి వీలుగా ‘బిల్డ్నౌ వర్క్ఫ్లో’ (BuildNow Workflow) అనే ప్రత్యేకమైన అనుమతుల ప్రక్రియను అమల్లోకి తీసుకురానున్నారు. ఈ ఇందిరమ్మ పట్టణ గృహ నిర్మాణ పథకం కింద నిర్మించే ఇళ్లకు ప్లానింగ్, బిల్డింగ్ పర్మిషన్ చార్జీల నుంచి ప్రభుత్వం పూర్తి మినహాయింపు ఇచ్చింది. ప్రణాళిక అనుమతులకు సంబంధించిన ఎలాంటి ఫీజులను వసూలు చేయకూడదని, వాటిని పూర్తిగా మాఫీ చేస్తూ విద్యాశాఖ/హౌసింగ్ ప్రతిపాదనలకు ప్రభుత్వం గ్రీన్ సిగ్నల్ ఇచ్చింది. ఈ రాయితీలు, సులభతరమైన అనుమతుల ద్వారా పట్టణ పేదలకు నాణ్యమైన ఇళ్లు సకాలంలో, అందుబాటు ధరల్లో అందించడమే ప్రభుత్వ ప్రధాన లక్ష్యమని నిర్దేశించబడింది.
