అధిక జ్యేష్ట మాసం 2026: చంద్ర సంవత్సరాలు, సౌర సంవత్సరాల మధ్యలో ప్రతీ 32 నెలలకు ఒకసారి అధిక మాసం వస్తుంది. హిందూ క్యాలెండర్ ప్రకారం.. శ్రీ పరాభవ నామ సంవత్సరంలో చంద్రమాన జ్యేష్ఠ మాసం ఈసారి అధిక మాసంగా వచ్చింది. ఈ అధిక జ్యేష్ఠ మాసం 2026 మే 17 నుంచి జూన్ 15 వరకు కొనసాగనుంది. సూర్యసిద్ధాంతం, సిద్ధాంత శిరోమణి వంటి గ్రంథాల ప్రకారం.. ఏ చంద్రమాసంలో సూర్య సంక్రాంతి లేకపోతే దానిని అధిక మాసం గా పరిగణిస్తారు. సౌర సంవత్సరం, చంద్ర సంవత్సరం మధ్య కాలవ్యత్యాసాన్ని సమన్వయం చేసేందుకు భారతీయ రుషులు ఈ విధానాన్ని ఏర్పాటు చేశారు. సాధారణంగా వచ్చే జ్యేష్ఠమాసంలో కొన్నిశుభకార్యాలు నిర్వహించారు. కాన ఇప్పుడు వచ్చిన అధిక జ్యేష్ఠమాసంలో ఎలాంటి పూజలు చేస్తారు? ఏం చేయకుండా ఉంటారు?
సాధారణంగా ఒక సౌరసంవత్సరంలో 365 రోజులు ఉంటాయి. చంద్రలో 354 రోజులు ఉంటాయి. ఈ మాసాలను సరిచేసేందుకు ప్రతీ 32 నెలలకు ఒకసారి అధికమాసంను చేర్చుతున్నారు. కొన్నిసార్లు అధిక ఆషాఢం,అధిక శ్రావణ మాసం వస్తుంది. ఈసారి అధిక జ్యేష్ఠమాసం వచ్చింది. అధిక జ్యేష్ఠమాసాన్ని పురుషోత్తమ మాసంగా కూడా పిలుస్తారు. ఈ కాలంలో కలుగుతున్న భక్తితో స్నానం, దానం, జపం, ఉపవాసం, విష్ణుపూజ చేస్తే పాపక్షయం, దారిద్ర్య నివారణ పురాణాలు చెబుతున్నాయి. పురుషోత్తమ మహాత్మ్య పఠనం, శ్రీకృష్ణారాధన, నక్తవ్రతం, ఒక భుక్తం వంటి ఆచారాలు ఎంతో పుణ్యప్రదమని భావిస్తున్నాయి. అధికమాసాంతంలో నెయ్యి, బెల్లం, ధాన్యం దానం చేయడం విశేష ఫలితాన్ని ఇస్తుందని శాస్త్రోక్తంగా పేర్కొన్నారు.
అయితే ఈ మాసంలో కొన్ని శుభకార్యాలు వర్జ్యంగా చెప్పబడ్డాయి. ముఖ్యంగా వివాహాలు, ఉపనయనాలు, గృహప్రవేశాలు, దేవతా ప్రతిష్ఠలు, కొత్త వాహనాలు లేదా భూమి కొనుగోలు వంటి కార్యక్రమాలు చేయరాదని ఆచారం చెబుతోంది. అలాగే కొత్త ఆభరణాలు, కొత్త వస్త్రధారణ, వ్రతోద్యాపనలు, యజ్ఞాలు కూడా నివారించాలని సూచించారు.
ఈ మాసంలో అవసరమైన నిత్యకర్మలు మాత్రం చేయవచ్చు. వార్షిక శ్రాద్ధాలు, పితృకార్యాలు, తీర్థశ్రాద్ధాలు, జన్మదిన పూజలు, రుద్రాభిషేకాలు, జపాలు, దానాలు, గ్రహణ సంబంధిత కర్మలు నిర్వహించేందుకు అధికమాసంలో నిషేధం లేదు. శాస్త్రాల ప్రకారం “ఆవశ్యక కర్మలకు అధికమాస దోషం లేదు” అనే సూత్రం ఇక్కడ ప్రధానంగా చెప్పబడింది.
