మీ వంటగది నుండి వెల్లుల్లి మరియు చేపల వాసనను సహజంగా ఎలా తొలగించాలి

Kitchen Tips : వంటగదిలో వంట చేసిన తర్వాత కిటికీలు, తలుపులు తెరిచినా కొన్నిసార్లు వెల్లుల్లి లేదా వేయించిన చేపల ఘాటైన వాసనలు అస్సలు పోవు. వీటిని అందుబాటులోకి తెచ్చే రసాయనాలతో కూడిన రూమ్ స్ప్రెలను ఉపయోగించే బదులు, మన వంటగదిలోని కొన్ని సహజసిద్ధమైన పదార్థాలతో ఈ సమస్యకు సులభంగా చెక్ పెట్టవచ్చు. వంటగది దుర్వాసనలను దూరం చేసే ఈ చిట్కాలు శాస్త్రీయంగా కూడా నిరూపించబడ్డాయి.

వెల్లుల్లి ఘాటును తగ్గించే పుదీనా

వెల్లుల్లిలోని సల్ఫర్ సమ్మేళనాల వల్లే ఆ ఘాటైన వాసన వస్తుంది. పుదీనాలో ఉండే ఫినాలిక్ సమ్మేళనాలు , ఎంజైమ్‌లు వెల్లుల్లిలోని సల్ఫర్ కణాలను విచ్ఛిన్నం చేసి, ఆ వాసనను తొలగించడంలో అద్భుతంగా సహాయపడతాయి. ‘ఫుడ్ సైన్స్ అండ్ టెక్నాలజీ’ జర్నల్‌లో ప్రచురితమైన ఒక అధ్యయనం ప్రకారం.. వెల్లుల్లి వాసనను తటస్థీకరించడంలో చాక్లెట్ మింట్ వంటి ఇతర రకాల కంటే పెప్పర్‌మింట్, స్పియర్‌మింట్ రకాలు మరింత ప్రభావవంతంగా పనిచేస్తాయని తేలింది. వంటలను తర్వాత, వంటగది పక్కన గుప్పెడు పుదీనా ఆకు ఉంచడం లేదా కొన్ని ఆకు నోట్లో వేసుకుని నమలడం చేయాలి.

చేపల వాసనకు రోజ్‌మేరీ విరుగుడు

వంటగది చేపల నీచు వాసనను తొలగించడం ఒక పెద్ద సవాలు. ఇవి ఇల్లంతా త్వరగా వ్యాపించడమే కాకుండా చాలా కాలం పాటు అలాగే ఉండిపోతాయి. దీనికి రోజ్‌మేరీ ఒక గొప్ప ఎంపికగా పనిచేస్తుంది. ఇందులోని యాంటీఆక్సిడెంట్ గుణాలు కలిగిన ఫినాలిక్ సమ్మేళనాలు, చేపల వాసనకు కారణమయ్యే అస్థిర సమ్మేళనాలను విచ్ఛిన్నం చేస్తుంది. ‘జర్నల్ ఆఫ్ సైన్స్’ పరిశోధన ప్రకారం.. రోజ్‌మేరీని ఉపయోగించడం వల్ల చేపల వాసన సుమారు 58 శాతం తగ్గినట్లు తేలింది. కాబట్టి చేపలను వేయించడం లేదా మ్యారినేట్ చేసేటప్పుడు కొద్దిగా రోజ్‌మేరీని చేర్చడం లేదా రోజ్‌మేరీ ఆధారిత నూనెలను ఉపయోగించడం వల్ల వంటకు రుచి పెరగడమే కాకుండా నీచు వాసన కూడా తగ్గుతుంది.

సువాసనలు వెదజల్లే ‘సినీయోల్’

రోజ్‌మేరీ , యూకలిప్టస్ (జామాయిల్) ఆకులలో ‘సినియోల్’ అనే సహజ రసాయన సమ్మేళనం ఉంటుంది. ఇది గాలిలోని దుర్వాసన కలిగించే బంధాన్ని ఏర్పరుచుకుని, వాటి లక్షణాలను మార్చేస్తుంది. దీనివల్ల వంటగదిలోని చెడు వాసనలు తొలగిపోతాయి. దీనికోసం రోజ్‌మేరీ లేదా యూకలిప్టస్ ఆకులను నీటిలో వేసి మధ్యస్థ మంట మీద బాగా ఉడికించాలి. ఆ ఆవిరిలో విడుదలయ్యే సినీయోల్ వంటగదిలోని దుర్వాసనలను సులభంగా దూరం చేస్తుంది.

వెల్లుల్లి వాసనను అణచివేస్తే పెరుగు

పెరుగు కూడా వెల్లుల్లి వాసనను తటస్థీకరించగలదని శాస్త్రీయంగా నిరూపితమైంది. పెరుగులో ఉండే కొవ్వు, ప్రోటీన్లు వెల్లుల్లి నుండి విడుదలయ్యే సుగంధ ద్రవ్యాలను బంధిస్తాయి, దీని వలన ఆ ఘాటు గాలిలోకి వ్యాపించకుండా తగ్గుతుంది. ‘మాలిక్యూల్స్’ అనే జర్నల్‌లో ప్రచురితమైన అధ్యయనం కూడా పెరుగు వినియోగం వల్ల అస్థిర సల్ సమ్మేళనాలు తగ్గుదలని స్పష్టం చేసింది. అందువల్ల మాంసం వంటి పదార్థాలను వండేటప్పుడు, వాటిని కొద్దిగా పెరుగులో నానబెట్టడం (మ్యారినేట్) ద్వారా వంటగదిలో వెల్లుల్లి వాసనను అదుపు చేయవచ్చు లేదా వెల్లుల్లి ఉన్న ఆహారంతో పాటు కొద్దిగా పెరుగును నంజుకోవచ్చు.

వంటగదిలోని బూజు లేదా వంటల ఘాటు వాసనలను తొలగించడానికి ఇకపై కృత్రిమ సువాసనల (ఆర్టిఫిషియల్ సెంట్లు) కోసం వెతకాల్సిన అవసరం లేదు. మనకు అందుబాటులో ఉంటే పెరుగు, పుదీనా, రోజ్‌మేరీ వంటి సహజ పదార్థాలు వంటకు అదనపు రుచిని అందించడమే కాకుండా, ఇంట్లో గాలిని కూడా స్వచ్ఛంగా మారుస్తాయి.