మిగిలిపోయిన పాలను ఎలా ఉపయోగించాలి: మిగిలిపోయిన పాలు లేదా ఒకటి, రెండు రోజుల పాత పాలను చాలామంది పనికిరావని భావించి పారేస్తుంటారు. అయితే పాలు పూర్తిగా పాడైపోకుండా, బూజు పట్టకుండా లేదా తీవ్రమైన దుర్వాసన రాకపోతే వాటిని ఎన్నో రకాలుగా ఉపయోగించవచ్చు. ఇలా చేయడం వల్ల ఆహార వ్యర్థాలు తగ్గడంతో పాటు డబ్బు కూడా ఆదా అవుతుంది. పాత పాలను ఉపయోగించి రుచికరమైన వంటకాలు ఎలా తయారు చేసుకోవచ్చో తెలుసుకుందాం.
1. మజ్జిగ తయారు చేసుకోండి: మిగిలిన పాలలో కొద్దిగా పెరుగు వేసి తోడు పెట్టండి. పెరుగు తయారైన తర్వాత నీరు, వేయించిన జీలకర్ర పొడి, నల్ల ఉప్పు, కొత్తిమీర కలిపి రుచికరమైన మజ్జిగ తయారు చేసుకోవచ్చు. ఇది శరీరాన్ని చల్లగా ఉంచడంలో.
2. దేశీ నెయ్యి తయారు చేయండి: పాత పాలపై ఏర్పడే మీగడను సేకరించి తక్కువ మంటపై వేడి చేస్తే స్వచ్ఛమైన దేశీ నెయ్యి తయారవుతుంది. ఇంట్లో తయారైన నెయ్యి రుచికరంగా ఉండటమే కాకుండా ఆరోగ్యానికి కూడా మంచిది.
3. కేకులు, బేకింగ్లో వాడండి: కేకులు, మఫిన్లు, పాన్కేక్లు, కుకీలు లేదా బ్రెడ్ తయారీలో కొద్దిగా పాత పాలను ఉపయోగిస్తే బేక్ చేసిన పదార్థాలు మరింత మెత్తగా, రుచికరంగా తయారవుతాయి.
4. గ్రేవీలు, సూప్లకు క్రీమీ టెక్స్చర్: తెల్లటి గ్రేవీలు, పాస్తా సాస్లు, సూప్లు లేదా ఇతర క్రీమీ వంటకాలలో మిగిలిన పాలను ఉపయోగిస్తే రుచి, చిక్కదనం రెండూ పెరుగుతాయి. అయితే పాలు పాడవలేదని ముందుగా నిర్ధారించుకోవాలి.
5. పనీర్ తయారు చేసుకోవచ్చు: పాలు కొద్దిగా విరిగే స్థితిలో ఉంటే వాటితో తాజా పనీర్ తయారు చేసుకోవచ్చు. వేడి పాలలో నిమ్మరసం లేదా వెనిగర్ వేసి విరిగిన తర్వాత గుడ్డతో వడకట్టి ఒత్తితే ఇంట్లోనే పనీర్ సిద్ధమవుతుంది.
6. పెరుగు తోడు పెట్టండి: పాత పాలను గోరువెచ్చగా చేసి అందులో కొద్దిగా పెరుగు కలిపి కొన్ని గంటలు ఉంచితే మంచి పెరుగు తయారవుతుంది. ఇది చాలా కాలంగా ఇళ్లలో పాటిస్తున్న సంప్రదాయ పద్ధతి.
ఉపయోగించే ముందు తప్పనిసరిగా గుర్తుంచుకోవాల్సినవి
అయితే పాలకు తీవ్రమైన పుల్లటి వాసన, రంగు మారినా లేదా బూజు వచ్చినా వాటిని ఎట్టి పరిస్థితుల్లోనూ ఉపయోగించకూడదు. పూర్తిగా పాడుకాని, సురక్షితంగా ఉన్న పాలను మాత్రమే వంటలకు లేదా ఇతర అవసరాలకు వినియోగించడం మంచిది.
