ఫిఫా ప్రపంచకప్ 2026 టోర్నీలో డిఫెండింగ్ ఛాంపియన్ అర్జెంటీనా జోరు కొనసాగుతోంది. మరోసారి తిరుగులేని పోరాట పటిమ ప్రదర్శనతో క్వార్టర్ ఫైనల్కు దూసుకెళ్లింది. అట్లాంటా స్టేడియంలో మంగళవారం రాత్రి ఉత్కంఠగా సాగిన ప్రీ-క్వార్టర్ ఫైనల్లో అర్జెంటీనా 3-2 తేడాతో ఈజిప్టును ఓడించింది. ఆట 92వ నిమిషంలో ఎంజో ఫెర్నాండెజ్ అందించిన అద్భుత గోల్తో అర్జెంటీనా విజయం లాంఛనమైంది.
ఫుట్బాల్ దిగ్గజాలు నెయ్మార్, క్రిస్టియానో రొనాల్డో.. అంతర్జాతీయ ఫుట్బాల్ నుంచి నిష్క్రమించడంతో లియోనెల్ మెస్సి కథ కూడా ముగియబోతుందనే సంకేతాలు కనిపించాయి. అందుకు తగ్గట్లే ఈజిప్ట్తో మ్యాచ్ హోరాహోరీగా సాగడంతో అభిమానులు ఉక్కిరి బిక్కిరి అయ్యారు. మ్యాచ్లో 78వ నిమిషం వరకు అర్జెంటీనా 0-2తో వెనుకంజలో ఉండటంతో మరో సంచలనం తప్పదా? అని అంత అనుకున్నారు. మెస్సి అభిమానులకైతే గుండెల్లో రైళ్లు పరుగెట్టాయి. కానీ అనూహ్యంగా అర్జెంటీనా 14 నిమిషాల వ్యవధిలో మూడు గోల్స్ కొట్టేసి మ్యాచ్ను లాగేసుకుంది.
మెస్సీ పెనాల్టీ మిస్
ఈజిప్ట్తో మ్యాచ్ అనగానే అర్జెంటీనా విజయం ఏకపక్షం అని అంతా అనుకుంటే.. పసికూన మెస్సీ టీంను వణికించింది. మ్యాచ్ ఆరంభం నుంచి ఈజిప్ట్ జట్టు అర్జెంటీనాకు గట్టి పోటీ ఇచ్చింది. ఆట 15వ నిమిషంలోనే యాసర్ ఇబ్రహీం హెడర్ ద్వారా గోల్ చేసి ఈజిప్టుకు 1-0 ఆధిక్యాన్ని అందించాడు. ఆ తర్వాత అర్జెంటీనాకు లభించిన పెనాల్టీ కెప్టెన్ లియోనెల్ మెస్సీ చేజార్చాడు. ఈజిప్ట్ గోల్ కీపర్ ముస్తఫా షోబీర్ అద్భుతంగా డైవ్ చేసి మెస్సీ పెనాల్టీని అడ్డుకున్నాడు. దాంతో 2010 తర్వాత ప్రపంచకప్లో అర్జెంటీనా తొలిసారి హాఫ్-టైమ్ సమయానికి గోల్ చేయకుండా వెనుకంజలో నిలిచింది.
ఆట 67వ నిమిషంలో మొహమ్మద్ సలా అందించిన పాస్తో ముస్తఫా జికో మరో గోల్ చేయడంతో ఈజిప్ట్ 2-0తో తిరుగులేని ఆధిక్యంలోకి దూసుకెళ్లింది. ప్రపంచకప్ చరిత్రలో అర్జెంటీనాపై ఏ ఆఫ్రికా దేశమైనా 2 గోల్స్ ఆధిక్యం సాధించడం ఇదే తొలిసారి.
నాలుగు నిమిషాల్లో తిప్పేసిన అర్జెంటీనా
రెండు గోల్స్ వెనుకంజలో ఉండే అర్జెంటీనా ఏమాత్రం అధైర్యపడలేదు. కేవలం నాలుగు నిమిషాల వ్యవధిలో మ్యాచ్ స్వరూపాన్ని మార్చేసింది. 83వ నిమిషంలో మెస్సీ అందించిన క్రాస్ను క్రిస్టియన్ రొమేరో గోల్గా మలిచాడు. ఆ వెంటనే మెస్సీ తన ట్రేడ్మార్క్ షాట్తో మరో గోల్ చేయడంతో స్కోర్లు 2-2తో సమమయ్యాయి. మ్యాచ్ ఎక్స్ట్రా టైంకు దారితీస్తున్న తరుణంలో (92వ నిమిషంలో) ఎంజో ఫెర్నాండెజ్ హెడ్ ద్వారా లీడ్ గోల్ సాధించి అర్జెంటీనాకు అద్వితీయమైన విజయాన్ని అందించాడు.
మెస్సీ సరికొత్త రికార్డులు
పెనాల్టీ మిస్ చేసినప్పటికీ.. ఈ మ్యాచ్లో లియోనెల్ మెస్సీ సరికొత్త రికార్డులు నమోదు చేశాడు. ఫిఫా ప్రపంచకప్లో అత్యధిక నాకౌట్ మ్యాచ్లు (14) ఆడిన మిరోస్లావ్ క్లోస్ రికార్డును మెస్సీ సమం చేశాడు. అలాగే.. వరల్డ్ కప్లో వరుసగా 6 నాకౌట్ మ్యాచ్ల్లో గోల్స్ చేసిన తొలి ఆటగాడిగా చరిత్ర సృష్టించాడు. ఈ టోర్నీలో ఇది మెస్సీకి 8వ గోల్ కాగా, మొత్తంగా ప్రపంచకప్ చరిత్రలో అతని గోల్స్ సంఖ్య 21కి చేరింది. క్వార్టర్ ఫైనల్లో అర్జెంటీనా.. స్విట్జర్లాండ్తో తలపడనుంది.
కథనం మొదట ప్రచురించబడింది: బుధవారం, జూలై 8, 2026, 7:48 (IST)
ఇతర కథనాలు ప్రచురించబడ్డాయి జూలై 8, 2026
